कॉफी फक्त चवीसाठी नाही, तर तिच्या आरोग्यदायी फायद्यांसाठीही प्रसिद्ध आहे. एक नवीन संशोधन दर्शवते की दररोज तीन कप कॉफीचे सेवन केल्याने अनेक चयापचय विकारांचा धोका लक्षणीयरीत्या कमी होऊ शकतो. विशेषत: मधुमेह आणि हृदयाशी संबंधित समस्यांचा धोका 40 ते 50 टक्क्यांनी कमी होतो, असे या संशोधनातून उघड झाले आहे.
कार्डियोमेटाबोलिक मल्टीमॉर्बिडिटी म्हणजे काय?
जगभरातील लोकसंख्या जसजशी वृद्ध होत आहे, तसतसे अनेक लोकांना एकाच वेळी अनेक चयापचय आणि हृदयाशी संबंधित आजार होण्याची शक्यता वाढत आहे. या स्थितीला "कार्डियोमेटाबोलिक मल्टीमॉर्बिडिटी" म्हणतात. या वाढत्या समस्येच्या पार्श्वभूमीवर, संशोधक आता या आजारांना प्रतिबंध करण्याच्या उपाययोजनांवर काम करत आहेत.
अभ्यास कसा करण्यात आला?
चीनमधील सुझो मेडिकल कॉलेज, सूझो विद्यापीठाच्या संशोधकांनी यूके बायोबँकेच्या डेटावर आधारित अभ्यास केला. या अभ्यासामध्ये 1.72 लाखांहून अधिक लोकांचा कॅफिन सेवनाचा अभ्यास करण्यात आला, ज्यात 1.88 लाख लोकांच्या कॉफी आणि चहा सेवनाच्या डेटा देखील समाविष्ट होता. या अभ्यासाच्या सुरूवातीला कोणत्याही सहभागींना हृदय किंवा चयापचयाशी संबंधित आजार नव्हते. जर्नल ऑफ क्लिनिकल एन्डोक्रिनोलॉजी अँड मेटाबोलिझम मध्ये प्रकाशित झालेल्या या संशोधनानुसार, जे लोक दररोज तीन कप कॉफी (200-300 मिलीग्राम कॅफिन) घेतात, त्यांच्यामध्ये कमी कॅफिन (100 मिलीग्रामपेक्षा कमी) घेणाऱ्या लोकांच्या तुलनेत कार्डियोमेटाबोलिक आजार होण्याचा धोका लक्षणीयरीत्या कमी होता.
कॅफिन आणि कॉफीचे संरक्षणात्मक गुणधर्म
कॉफी आणि चहा यांसारख्या पेयांमध्ये असणारे कॅफिन फक्त ऊर्जा वाढवण्यासाठी नाही, तर त्याचे अनेक आरोग्यदायी फायदे आहेत. कॅफिन चॉकलेट्स, एनर्जी ड्रिंक्स, आणि इतर पेयांमध्ये देखील आढळते. दररोज माफक प्रमाणात कॅफिनचे सेवन केल्याने मधुमेह, उच्च रक्तदाब आणि हृदयविकारांचा धोका कमी होतो, असे या संशोधनातून स्पष्ट झाले आहे.
निष्कर्ष
सध्याच्या जीवनशैलीमध्ये हृदय आणि चयापचयाशी संबंधित आजार वाढत आहेत. परंतु दररोजच्या आहारात तीन कप कॉफीचा समावेश केल्यास या आजारांना प्रतिबंध करता येऊ शकतो. अर्थात, कॅफिनचे सेवन नियंत्रित ठेवणे महत्त्वाचे आहे, कारण जास्त प्रमाणात सेवन केल्यास काही दुष्परिणाम देखील होऊ शकतात.
